化妝師Judy：Sofina底妝試後感
幾個月前聽朋友講，Sofina 嘅 liquid foundation 好 long lasting，所以一早已經買咗支，但係我覺得無乜特別，唔係啲人講到咁好用。最近見電視成日播佢支 long keep base 嘅廣告，就即刻買，想試吓佢成 set: base + foundation 會唔會效果唔同啲。
我本身係油性皮膚，用過好多控油產品都覺得無乜功效，希望今次可以搵到救星啦！
喺上面幅圖都見到，素顏嘅我，皮膚除咗偏油，仲有啲泛紅。先搽 long keep base，個質哋幾流質，一搽完已經覺得好清爽，有啲近似上完 loose powder 嘅觸感。再上埋 liquid foundation，其實我試過兩次，第一次直接用海綿上粉，但佢嘅質地比較「杰」，有少少難blend得薄，所以我第二次試嘅時候，先喺面上噴保濕水，然後再上粉底，效果即刻貼薄好多。最後掃少少碎粉。
唔知係咪因為標榜控油同持久，所以全個底妝都係好啞色，就算我只係搽咗好少碎粉，都係好啞緻，比平時個樣明顯「粉」啲。
經過 5 個鐘之後就係咁嘅樣喇！
其實大約 3 個鐘左右，個鼻已經開始有少許出油，但情況唔算嚴重；5個鐘之後個樣，T-zone位其實已經溶咗一半，不過兩邊面都仲 keep 到。
結論：比一般聲稱控油嘅底妝產品持久啲，但絕對唔係佢講keep到10小時咁耐囉，可能中性偏油嘅皮膚用會好啲，好似我呢啲全油性皮膚，效果會差少少。如果唔介意個妝啱啱化好嗰陣塊面好粉啞，都可以一試嘅。
撰文：Judy B Leung 化妝師
除咗文字，幾乎對所有藝術有關嘅嘢都有興趣：音樂、畫畫、做手工…… 最鍾意係喺塊面上面畫畫！中學開始化妝返學，俾同學問：「點解你一條眉深色一條眉淺色？」就下定決心要學好化妝，立志唔再俾人笑！
