化妝師Judy：新年喇！皮膚都要食飯先！
就快過年喇！要見人嘅日子，一定要 keep靚靚個樣啦！呢個星期一定要勤力啲護理吓啲皮膚先得～～我係化妝師，當然好著重見人嗰陣化嘅妝啦！一個妝化得靚唔靚，你最在乎邊 part呢？相信好多女士們都會認為係對眼，係咪呢？眼妝固之然重要啦，其實個底妝一樣咁重要ga！而皮膚質素亦都好直接影響個底妝。
最近試咗隻mask，係米紙嚟嘅（唔知係咪平時食越南水晶卷嗰啲呢？)，敷之前要用精華液浸塊米紙3分鐘，等佢完全滲透先再敷上面。我通常敷mask之前都會做咗磨砂，搽埋toner同神仙水先，咁會吸收好多ga。
講返個米紙mask先，佢本身係全乾，真係好似啲越南米紙未煮嗰陣一樣咁「脆」，所以一打開個盒已經有啲位碎咗！
同埋可能係個case嘅問題，啲精華滲透得唔係幾平均，張米紙有啲地方好濕，有啲地方仲係硬掘掘，諗住浸佢耐啲啦，但佢又會太稔，好易爛……不過因為個質地有少少似gel mask，所以好貼面，同埋敷mask最緊要都係個效果啫，如果效果好，事前功夫幾煩都無所謂啦XD
買嗰陣其實只係貪得意，加上全部寫韓文，我都唔識睇，所以完全唔知功效係咩……不過敷完之後，覺得啲皮膚白滑咗，而且保濕得嚟又唔「笠」，都唔錯喎！記得唔好敷超過 20 分鐘，因為佢無 paper mask trap 到咁多精華液。
以前聽人講用洗米水洗面（或者當toner用）對皮膚好，我都有試過嘅，但因為洗米水唔keep得耐，要幾日整一次，慢慢就無心機再整，呢個 mask 真係方便好多，仲好似俾皮膚食咗飯咁。我用咗兩次，已經又入咗貨喇~ 但買之前真係要格吓價先，我見到最平 $18/塊，最貴要成 $40/塊，相差好遠！
敷完 mask 嗰晚，我一定會用埋 sleeping mask，做個完整嘅 intensive care！
撰文：Judy B Leung 化妝師
除咗文字，幾乎對所有藝術有關嘅嘢都有興趣：音樂、畫畫、做手工…… 最鍾意係喺塊面上面畫畫！中學開始化妝返學，俾同學問：「點解你一條眉深色一條眉淺色？」就下定決心要學好化妝，立志唔再俾人笑！
